Ҳолати 14. – Шаҳрванди хориҷӣ ё шахси бешаҳрванд, ки мақоми гуреза ё шахси паноҳҷӯянда доранд, мехоҳанд тӯй ё дигар маъракаҳои ҷашнӣ гузаронанд.

14.1. Дар аввал пурсед, ки мизоҷ ба кадом маҳали аҳолинишин истиқомати муваққатӣ дорад?

i.                 Ба шаҳрванди хориҷӣ ё шахси бешаҳрванде, ки мақоми гуреза ё шахси паноҳҷӯянда доранд, мехоҳанд тӯй ё дигар маъракаҳои ҷашнӣ гузаронанд, тибқи Қонуни Ҷумҳурии Тоҷикистон «Дар бораи танзими ҷашну маросим дар Ҷумҳурии Тоҷикистон» аз 20 июни соли 2024, таҳти №2048, чунин ҳуқуқро доранд, масалан, тибқи моддаи 10 қонуни болозикр ҷашни зодрӯз ба таври ихтиёрӣ танҳо дар доираи оила гузаронда мешавад ё тибқи моддаи 12 қонуни болозикр тӯйи домодию арӯсӣ бо гузарондани на зиёда аз ду маърака ва дар давоми на бештар аз ду рӯз ба таври ихтиёрӣ бо оростани зиёфат барои то 150 нафар ва додани тӯё барои то 200 нафар аз ҳисоби ҳар ду ҷониб гузаронда мешавад ё тибқи қисми 2 моддаи 14 қонуни болозикр маросими се, чил ва сол ҳангоми иҷрои маросими дафну азодорӣ бе забҳи чорво ва додани таом гузаронида мешавад ва ѓайра.

ii.               Аз ин рӯ, ба онҳо машварат диҳед, ки онҳо метавонанд ба Ташкилоти ҷамъиятии «Инсон ва Адолат» муроҷиат карда, машварати лозимӣ дар он ҷой гиранд.  Ташкилоти ҷамъиятии «Инсон ва Адолат», дар шаҳри Душанбе, кӯчаи Деҳлавӣ, 10 воқеъ мебошад. Телефон барои тамос: (+992) 919315816. Ба шаҳрвандони хориҷӣ ё шахсони бешаҳрванде, ки дар шаҳри Ваҳдат муваққатан истиқомат мекунанд, машварат диҳед, ки ба филиали Ташкилоти ҷамъиятии «Инсон ва Адолат», ки воқеъ дар шаҳри Ваҳдат, кӯчаи 20-солагии Истиқлолият, 35, ошёнаи 2, даромадгоҳ аз тарафи чап мебошад (дар ошёнаи 1-ум Бонки «Ҳумо ҷойгир мебошад»), муроҷиат намоянд. Телефонҳо барои тамос: (+992) 784015555, (+993) 904444486.

iii.             Инчунин, ба чунин шахсон машварат диҳед, ки онҳо метавонанд бевосита ба Комиссияи доимии маҳаллӣ оид ба танзими ҷашну маросим дар назди мақомоти иҷроияи маҳаллии ҳокимияти давлатии ҷойи зисти муваққатӣ муроҷиат намоянд. Масалан, агар мизоҷ дар шаҳри Ваҳдат истиқомати муваққатӣ дошта бошад, пас ба бахши болозикри ш. Ваҳдат муроҷиат намоянд.